《愛情不是你的救生圈》
當年二十歲嘅我都係一個好傻好天真嘅妹豬
會幻想自己好似韓劇咁會做到灰姑娘
遇到一個電視機走出嚟嘅男人，
然後人生從此向住好嘅方向改變。
後來遇上麥仔，
我就知道遇上白馬王子呢啲機會並唔屬於我。
而且我都唔應該將愛情當成救生圈
妄想有人會拉我離開一塌糊塗嘅生活，拯救我嘅人生。
前排有個朋友話：
「個個都想搵個高大靚仔運動型嘅男朋友，
但係自己就日日匿喺屋企食薯片睇Netflix。」
呢個應該係好多好多人嘅寫照。
係人都想揀最好，想搵個內外條件都優秀嘅人
想搵個陽光系男朋友，沾染下陽光氣息。
想搵個樣靚身材正女朋友，做個男生勝利組。
想搵個有錢有事業嘅男人，人生可以努力少幾年。
想搵個outgoing嘅另一半，帶自己走出又宅又毒嘅生活。
想搵個社會上層嘅人，帶自己脫離下層生活。
我哋或多或少都有幻想過，愛情會幫助自己改善埋生活。
我唔否定有啲愛情真係可以做到呢個效果，
事實係有好多人都靠另一半嘅財力達至理想生活，
但呢個應該係愛情帶嚟嘅「結果」，
而非當初嘅「目的」。
愛情嘅初心，並非源於想要被拯救。
我都廢事再講好老套嘅：
「當你成為更好嘅人就會吸引到更好嘅人」
我淨係想好坦白地話你知：「你憑咩。」
你問心，如果你係條件咁好嘅人，你又會點揀。
如果你同我一樣，並無做白雪公主嘅優越條件
不如腳踏實地少少，唔好再幻想世上會有白馬王子。
自己嘅生活先由自己出手拯救。
（唔好忘記白雪公主本身都係富二代係公主，
而你只係公主病啊親！）
自己嘅人生都係交番落自己手
切忌全部一次過押喺對方身上，
更加唔好將自己嘅人生規劃建基於對方嘅條件身上。
例如對方有BNO/外國戶藉可以帶你逃離地獄。
IG：@hkgirlfriend
FB：港女友
Search